స్కిల్ డెవలప్‌మెంట్ స్కాం కేసులో ఏపీ మాజీ సీఎం, టీడీపీ అధినేత చంద్రబాబు అరెస్ట్ అయిన విషయం తెలిసిందే. విజయవాడ ఏసీబీ కోర్డు ఆయనకు 14 రోజుల రిమాండ్ విధించగా.. ప్రస్తుతం ఆయన రాజమహేంద్రవరం సెంట్రల్ జైల్‌లో రిమాండ్ ఖైదీగా ఉన్నారు. ఒక మాజీ ముఖ్యమంత్రి అరెస్టు కావటం రెండు తెలుగు రాష్ట్రాల్లో ఇదే తొలిసారి. చంద్రబాబు అరెస్టుతో ఏపీలో ఉద్రిక్త పరిస్థితులు నెలకొన్నాయి.
ఇక చంద్రబాబు అరెస్టు విషయమై తెలంగాణలోని వివిధ పొలిటికల్ పార్టీలకు చెందిన నేతలు ఆచితూచి వ్యవహరిస్తున్నారు. ఎక్కడా నోరు మెదపటం లేదు. ఒక్క తుమ్మల నాగేశ్వరరావు మాత్రమే చంద్రబాబు అరెస్టును ఖండించారు. ఇదిలా ఉండగా.. బాబు అరెస్టుపై సీఎం కేసీఆర్ ఆరా తీస్తున్నట్లు తెలుస్తోంది. గత నాలుగు రోజులుగా ఏపీలో జరుగుతున్న పరిణామాలపై మినిట్ టూ మినిట్ అప్డేట్స్ తెలుసుకుంటున్నట్లు సమాచారం. ఇంటెలిజెన్స్ వర్గాల ద్వారా ఏపీలోని పలువురికి ఫోన్లు చేయించి అక్కడి పరిస్థితిలపై ఎప్పటికప్పుడు ఆరా తీస్తున్నట్లు తెలిసింది.
కేసీఆర్ ఆరా తీయటానికి కారణం లేకపోలేదు. రాష్ట్ర ఆవిర్భావం తర్వాత.. చాలా మంది టీడీపీ నేతలు,కార్యకర్తలు టీఆర్ఎస్ (బీఆర్ఎస్) పార్టీలో చేరారు. చంద్రబాబు, ఎన్టీఆర్ అంటే అభిమానం ఉన్నప్పటికి రాజకీయ కారణాల దృష్ట్యా చాలా మంది గులాబీ గూటికి చేరారు. 2018 అసెంబ్లీ ఎన్నికల సమయంలో తెలుగు దేశం పార్టీ, కాంగ్రెస్ పార్టీతో పొత్తు పెట్టుకొని బీఆర్ఎస్‌ను ఓడించేందుకు ప్రయత్నించింది. ఆ తర్వాత 2019 ఏపీ అసెంబ్లీ ఎన్నికల్లో వైసీపీ గెలుపు కోసం బీఆర్ఎస్ అన్ని విధాలా సహకరించిందన్న అభిప్రాయం రాజకీయ వర్గాల్లో ఉంది.
చంద్రబాబు అరెస్టు, ఆ తర్వాత పరిస్థితులను సీఎం కేసీఆర్ నిశితంగా గమనిస్తున్నట్లు తెలుస్తోంది. సోషల్‌ మీడియాలో చంద్రబాబు అరెస్టుపై నెటిజెన్స్‌ పెట్టిన కామెంట్స్‌ను కూడా కేసీఆర్ చదువుతున్నట్లు సమాచారం. బాబు అరెస్టుపై ప్రజల స్పందన ఎలా ఉంది. తెలంగాణ ప్రజలు ఏమనుకుంటున్నారు. రాజకీయంగా ఎలాంటి టర్న్ తీసుకుంటుంది. తదితర విషయాలపై ఆయన ఆరా తీసినట్లు తెలిసింది. స్కిల్ డెవల్‌పమెంట్‌ కేసు, ఆ కేసు పూర్వాపరాల గురించి కూడా సీఎం కేసీఆర్ తెలుసుకున్నట్లు సమాచారం.
