తమిళంలో ఓ ఐదారు సినిమాల్లో నటించిన తరవాత ‘జంబలకిడి పంబ’ సినిమాతో తెలుగు ప్రేక్షకులకు పరిచయమయ్యారు ఆమని. ఈవీవీ సత్యనారాయణ లాంటి గొప్ప డైరెక్టర్ ద్వారా ఆమె టాలీవుడ్‌లోకి అడుగుపెట్టారు. అంతేకాదు, తొలిసినిమాతో మగరాయుడు లాంటి క్యారెక్టర్ చేశారు. మగాళ్లపై ఆడవాళ్లదే పైచేయి ఉండాలని భావించే మనస్తత్వం ఉన్న అమ్మాయిలా అద్భుతంగా నటించారు. అయితే, ఈ సినిమాలో హీరో నరేష్‌ను పెళ్లాడిన తరవాత ఒక పాట ప్రారంభంలో బీర్ బాటిల్ మూత స్టైల్‌గా ఓపెన్ చేసి పొంగుతున్న బీర్ సీసాను నోట్లో పెట్టుకుంటారు ఆమని. ఈ సీన్ ఆమె రియల్‌గా చేశారట. ఆమెకు రియల్ బీరే ఇచ్చారట. ఈ విషయాన్ని ఆమని తాజాగా ఓ ఇంటర్వ్యూలో వెల్లడించారు.
‘‘ఇందులో మందుకొట్టే సీన్ ఉంది, సిగరెట్ కాల్చే సీన్ ఉంది అని డైరెక్టర్ నాకు ముందు చెప్పలేదు. షూటింగ్ స్పాట్‌కు వెళ్లినప్పుడు ఏ అమ్మాయి ఈరోజు మందుకొట్టే సీన్ ఉంది అన్నారు. నేను ‘సార్’ అని మొహం అదోలా పెట్టేదాన్ని. నాకు అదంతా కొత్త.. తెలీదు. సరే బాటిల్‌లో ఏదో కూల్ డ్రింక్ వేసి ఇస్తారులే అనుకుంటే.. బాటిల్‌ను ఓపెన్ చేస్తే బయటికి పొంగాలన్నారు. పొంగినప్పుడు నువ్వు సిప్ చేయాలి అన్నారు. ఒక్క షాట్ చేయమ్మా అన్నారు. హీరో నరేష్ గారు కూడా ఏం కాదమ్మా.. తాగు అన్నారు. సిగరెట్ కూడా డైరెక్ట్‌గా కాల్చాలి. ఆ స్మోక్ బయటికి స్టైల్‌గా వదలాలి. నేను ఒక అరగంట ప్రాక్టీస్ చేసి అవన్నీ చేశాను’’ అని ఆమని చెప్పుకొచ్చారు.
ఆ తరవాత మళ్లీ ‘చావు కబురు చల్లగా’ సినిమాలో మందు కొట్టే సీన్స్‌లో తాను నటించానని.. అయితే, ఈసారి బాటిల్‌లో కూల్ డ్రింక్ పోసి ఇచ్చారని ఆమని వెల్లడించారు. ‘‘గీతా ఆర్ట్స్ నుంచి పిలుపు వచ్చింది. కథ చెప్పారు. నాకు నచ్చింది. నేను తప్పకుండా చేస్తానని డైరెక్టర్ కౌశిక్‌తో చెప్పాను. ఆ తరవాత అరవింద్ గారు వచ్చారు. చేస్తావా అమ్మా అని అడిగారు. చేస్తాను సార్.. కథ నాకు చాలా నచ్చింది అని చెప్పాను. అంటే, అందులో మందుకొట్టే సీన్ ఉంది ఓకేనా నీకు అని అన్నారు. ఫర్వాలేదు సార్.. నేను ఫస్ట్ సినిమాలోనే చేశాను అని నవ్వుతూ చెప్పాను’’ అని ఆమని వెల్లడించారు. ఈ సినిమాతో తన పాత్రకు మంచి పేరు వచ్చిందని ఆమని అన్నారు.
