ఆదిలాబాద్‌ : మావల పోలీస్‌ స్టేషన్‌ పరిధిలోని మావల శివారు ప్రాంతాంలో గల జాతీయ రహదారిపై శనివారం టమాటాల లారీ బోల్తా పడింది. రోడ్డుపై ద్విచక్రవాహనాన్ని తప్పించబోయి లారీ ఒక్కసారిగా అదుపు తప్పి కింద బోల్తా పడింది. దీంతో లారీల ఉన్న టమాటాలు రోడ్డుపై పడి బయటకు వచ్చాయి. ఈ విషయం తెలుసుకున్న స్థానికులు లారీ బోల్తాపడిన ప్రాంతానికి పెద్ద సంఖ్యలో చేరుకున్నారు. వాటిని ఎత్తుకెళ్లకుండా సెక్యూరిటీని ఏర్పాటు చేశారు. లారీ బోల్తా పడ్డ ప్రాంతానికి చేరుకున్న పోలీసులు.. లారీ యజమాని విజ్ఞప్తి మేర మరో లారీని తెప్పించి అందులో టమాటాలను తరలించారు. ఈ లారీ కర్ణాటకలోని కోలార్ నుండి ఢిల్లీ వెళ్తోంది. గతంలో టమాటాలకు గిట్టుబాటు ధర లేక రోడ్లపై పారబోసి వెళ్లిన సంఘటనలు చూశాం. ఇప్పుడు అదే రోడ్డుపై పడిన టమాటాకు సెక్యూరిటీ ఏర్పాటు చేయడం గమనార్హం.
అకాల వర్షాలు, భారీ వరదల కారణంగా పంట నష్టం, సరఫరా ఇబ్బందుల నేపథ్యంలో టమాటా ఖరీదుగా మారింది. రిటైల్ గా కిలో టమాటా ధర రూ.100 నుంచి రూ.250 వరకు పలుకుతోంది. ఈ నేపథ్యంలో అధిక ధర పలుకుతున్న పలుచోట్ల కేంద్రం రాయితీపై కిలో రూ.90కే విక్రయిస్తోంది. మొత్తానికి గత కొన్నిరోజులుగా టమాటా ధరలు పతాక శీర్షికలకు ఎక్కుతున్నాయి.
