జోరుగా ప్రచారం
వచ్చే ఎన్నికల్లో సీఎం కేసీఆర్‌ నమ్మినబంటు పోటీ ఖాయమేనా?
హైదరాబాద్‌: సీఎం కేసీఆర్‌కు అత్యంత నమ్మినబంటుగా పేరొందిన మాజీ సీఎస్‌ సోమేశ్‌ కుమార్‌ బీఆర్‌ఎస్‌లో చేరనున్నారనే ప్రచారం జోరుగా జరుగుతోంది. వచ్చే ఎన్నికల్లో బీహార్‌ నుంచి ఎంపీగా పోటీ చేస్తారని చెబుతున్నారు. అప్పటివరకు తెలంగాణ ప్రభుత్వ సలహాదారుడిగా ఆయనకు కేసీఆర్‌ అవకాశం కల్పిస్తారనే టాక్‌ నడుస్తోంది. అన్ని రాష్ట్రాలకు పార్టీని విస్తరించే దిశగా బీఆర్ఎస్ అధిష్టానం అడుగులు వేస్తోంది. అందులో భాగంగా సోమేష్‌ కుమార్‌ను బీహార్‌ బీఆర్ఎస్ అధ్యక్షుడిగా నియమించనున్నారట.
సీఎం కేసీఆర్‌కు అత్యంత నమ్మకస్తుడిగా పేరున్న ఆయనకు బీహార్‌ బీఆర్ఎస్ బాధ్యతలను కేసీఆర్‌ అప్పగించనున్నారా? సోమేష్‌ కుమార్‌ వీఆర్‌ఎస్‌ తీసుకోవడం వెనుక కారణం పొలిటికల్‌ ఎంట్రీ ఇవ్వడానికేనా? అంటే అవుననే ఊహాగానాలు టీ పాలిటిక్స్‌లో గత కొద్దిరోజులుగా చక్కర్లు కొడుతున్నాయి.
ఉద్యోగాలను వదిలేసి తెలంగాణ రాజకీయాల్లోకి ఇటీవల ఐఏఎస్, ఐపీఎస్‌లు ఎక్కువగా అడుగుపెడుతున్నారు. రిటైర్మెంట్‌కు ఇంకా చాలా టైమ్‌ ఉండగానే రాజీనామాలు చేసి రాజకీయాల్లోకి అరంగ్రేటం చేస్తోన్నారు. ఇప్పటికే ఐపీఏస్‌ ఆఫీసర్‌ ఆర్‌ఎస్‌ ప్రవీణ్‌ కుమార్‌ వాలంటరీ రిటైర్మెంట్‌ తీసుకుని బీఎస్పీ పార్టీ తరపున కేసీఆర్‌ సర్కార్‌పై పోరాటం కొనసాగిస్తున్నారు. ఇక వీఆర్‌ఎస్‌ తీసుకున్న ఐఏఎస్ అధికారి ఆకునూరి మురళి కూడా తెలంగాణ రాజకీయల్లో యాక్టివ్‌గా ఉన్నారు. కొత్త పార్టీ పెట్టనున్నట్లు ఇటీవల ఆయన ప్రకటించగా.. ప్రస్తుతం కేసీఆర్‌ ప్రభుత్వ వైఫల్యాలను ప్రశ్నిస్తున్నారు.
ఈ క్రమంలో మాజీ ఐఏఎస్ ఆఫీసర్‌ సోమేష్‌ కుమార్‌ కూడా పొలిటికల్‌ ఎంట్రీ ఇవ్వనున్నారనే వార్తలు జోరందుకున్నాయి. తెలంగాణ సీఎస్‌గా పనిచేసిన ఆయన ప్రభుత్వ, రాజకీయ వర్గాల్లో కేసీఆర్‌కు అత్యంత సన్నిహితుడిగా ముద్ర పడ్డారు. ధరణి పోర్టల్‌ ఆలోచన సోమేష్‌ కుమార్‌దేనని చెబుతూ ఉంటారు. కేసీఆర్‌ ప్రభుత్వానికి అనుకూలంగా ఆయన అనేక విషయాల్లో పనిచేశారనే ఆరోపణలు రాజకీయ వర్గాల్లో ఉన్నాయి. కేసీఆర్‌కు అత్యంత నమ్మినబంటుగా ఆయనను అందరూ చెబుతూ ఉంటారు.
సీఎం కేసీఆర్‌ కూడా పలు వేదికలపై బహిరంగంగా సోమేష్‌ కుమార్‌ పనితీరును మెచ్చుకున్నారు. ఈ క్రమంలో ఆయనను ఏపీ క్యాడర్‌కు బదిలీ చేస్తూ హైకోర్టు తీర్పు ఇవ్వడంతో పరిణామాలు మారిపోయాయి. హైకోర్టు ఆదేశాలతో ఏపీలో ఆయన రిపోర్ట్‌ చేయగా.. నెల రోజుల పాటు ఎలాంటి పదవి అప్పగించలేదు. దీంతో ఇటీవల సోమేష్‌ కుమార్‌ వీఆర్‌ఎస్‌కు దరఖాస్తు చేసుకోగా.. జగన్‌ ప్రభుత్వం వెంటనే ఆమోదం తెలిపింది. డిసెంబర్‌ వరకు సర్వీస్‌ ఉన్నా.. బీఆర్‌ఎస్‌లో చేరేందుకే వీఆర్‌ఎస్‌ తీసుకున్నారనే ప్రచారం బలంగా జరుగుతోంది. త్వరలోనే గులాబీ కండువా కప్పుకునే అవకాశముందని అంటున్నారు. మరి ఈ వార్తలు నిజమేనా? లేదా? అనేది తెలియాలంటే కొద్దిరోజులు వేచి చూడాల్సిందే.
