జీవితాంతం రుణపడి ఉంటామన్న కుటుంబసభ్యులు
సూపర్ స్టార్‌ మహేష్‌ బాబు రియల్‌ లైఫ్‌లోనూ హీరోగా అనిపించుకుంటున్నారు. తాజాగా ఓ పసిబిడ్డ ప్రాణాలు నిలబెట్టి ఆ ఫ్యామిలీకి దేవుడయ్యాడు. అయితే మహేష్‌ను దూరం నుంచి చూసినవారికి ఆయన చేసే సేవా కార్యక్రమాల గురించి అంతగా తెలియదు. ఎందుకంటే దీనికి ప్రచారం కల్పించుకోవడం తనకు ఇష్టముండదు. సాయం పొందినవారు చెప్తే తప్ప అది బయటకురాదు. ప్రస్తుతం అలాంటి విషయాన్నే ట్విట్టర్‌ పోస్టులో పంచుకున్నారు నిర్మాత నాగ వంశీ . తాజాగా ఒక పసిబిడ్డ ప్రాణాన్ని కాపాడిన మహేష్‌ బాబు ఫాండేషన్‌ గురించి వెల్లడిరచారు. పిల్లల శస్త్ర చికిత్స అవసరాలను తీరుస్తున్న మహేష్‌ బాబు ఫౌండేషన్‌ను స్థాపించినందుకు మహేష్‌, నమ్రత దంపతులకు కృతజ్ఞతలు తెలిపారు.
సర్జరీ తర్వాత కోలుకున్న పసి బిడ్డను చూడటం ఆనందంగా ఉందని ట్వీట్‌ చేసిన నాగ వంశీ.. దీని గురించి లాంగ్‌ నోట్‌ను షేర్‌ చేశారు. ‘కొన్ని వారాల కిందట తన క్లోజ్‌ ఫ్రెండ్స్‌లో ఒకరు ఫోన్‌ చేసి సర్జరీ అవసరమున్న పసిబిడ్డ గురించి చెప్పారు. పూట గడవని స్థితిలో ఉన్న ఆ ఫ్యామిలీకి సాయం చేయాలని, ఈ విషయాన్ని మహేష్‌ బాబు ఫౌండేషన్‌కు చేరేందుకు హెల్ప్‌ చేయాల్సిందిగా కోరాడు. తను ఇలాంటి ఫ్యామిలీస్‌, పిల్లలకు హెల్ప్‌ చేసేందుకు అవిశ్రాంతంగా పనిచేస్తుంటాడు. నేను ఈ విషయాన్ని మహేష్‌ బాబు ఫౌండేషన్‌కు ఫార్వార్డ్‌ చేయడంతో పాటు నమ్రత గారిని పర్సనల్‌గా కలిసి చెప్పాను. ఆమె వెంటనే స్పందించి పూర్తి వివరాలను పంపమంటే పంపించాను. దీంతో ఆ చైల్డ్‌కు సాయం చేయాల్సిందిగా ఫౌండేషన్‌కు సూచించారు’ అని చెప్పుకొచ్చారు.
అయితే రెండు వారాల తర్వాత సర్జరీ పొందిన ఫ్యామిలీ నుంచి తనకు మెసేజ్‌ వచ్చినట్లు నాగవంశీ తెలిపారు. తాము మహేష్‌ చేసిన మేలుకు జీవితాంతం రుణపడి ఉంటామని కృతజ్ఞత తెలిపారని వెల్లడిరచాడు. కాగా.. ఇలాంటి ఎన్నో కుటుంబాల దీవెనలు.. మహేష్‌తో పాటు అతని ఫ్యామిలీని చల్లగా, సంతోషంగా ఉంచుతాయని నాగ వంశీ అభిప్రాయపడ్డారు. కష్టాల్లో ఉన్న తమను ఆదుకున్న వ్యక్తులను దేవుడిగా భావిస్తారని.. మహేష్‌ బాబు అండ్‌ ఫ్యామిలీ కూడా ఇదే మార్గంలో నడుస్తున్నారని పేర్కొన్నారు. ఈ మేరకు మహేష్‌తో పాటు నమ్రత శిరోద్కర్‌కు మరోసారి థాంక్స్‌ చెప్పాడు నాగ వంశీ.
