హైదరాబాద్‌లో రౌడీలు బరితెగిస్తున్నారు. పబ్లిక్ ప్రదేశాల్లో రెచ్చిపోయి ప్రవర్తిస్తున్నారు. పలువురిపై దాడి చేసి వీరంగం సృష్టించే ప్రయత్నం చేస్తోన్నారు. తాజాగా బంజారాహిల్స్‌లోని చీర్స్ పబ్బులో రౌడీలు దౌర్జన్యానికి పాల్పడ్డారు. ఓ వ్యాపారవేత్తపై దాడి చేశారు. దీంతో పబ్‌లో ఉద్రిక్తత చోటుచేసుకుంది.
మేడ్చల్ జిల్లా కేశవ మండలం గోధుమకుంట గ్రామానికి చెందిన వ్యాపారవేత్త హరీశ్ రెడ్డి ఆదివారం రాత్రి బంజారాహిల్స్ రోడ్ నంబర్ 14లో ఉన్న ఛీర్స్ పబ్‌కి వెళ్లాడు. ఆయన వెంట 10 మంది స్నేహితులు కూడా ఉన్నారు. ఫ్రెండ్స్‌తో కలిసి పార్టీ చేసుకుంటూ ఫుల్ చిల్ అవుతున్నారు. రాత్రి 11.35 గంటల ప్రాంతంలో మద్యం తాగుతూ స్నేహితులతో ఎంజాయ్ చేస్తున్నాడు. అయితే ఏమైందో ఏమో కానీ ఒక్కసారిగా అకస్మాత్తుగా వెనుక నుంచి ఒక వ్యక్తి వచ్చాడు. అకారణంగా హరీష్ రెడ్డితో గొడవకు దిగాడు.
వాగ్వాదం తీవ్రతరం కావడంతో హరీష్ రెడ్డిపై చేయి చేసుకున్నాడు. అనంతరం తన స్నేహితులు పది మందిని కూడా పిలిచాడు. అందరూ కలిసి హరీష్ రెడ్డిపై మూకుమ్మడిగా దాడికి పాల్పడ్డారు. హరీష్ రెడ్డిని నోటికొచ్చినట్లు తిట్టడంతో పాటు దాడి చేశారు. అడ్డొచ్చిన ఆయన స్నేహితులపై కూడా విచాక్షణారహితంగా దాడి చేశారు. స్నేహితులందరినీ చితకబాడారు.
దీంతో హరీశ్ రెడ్డితో పాటు ఆయన స్నేహితులకు కూడా తీవ్రంగా గాయలయ్యాయి. దీంతో చికిత్స కోసం ఆస్పత్రిలో చేరారు. హరీష్ రెడ్డికి చెందిన 30 గ్రాముల బంగారు గొలుసు కూడా మాయమైంది.
ఈ ఘటనపై హరీష్ రెడ్డి వెంటనే బంజారాహిల్స్ పోలీసులకు ఫిర్యాదు చేశారు. దీంతో పోలీసులు కేసు నమోదు చేసుకుని దర్యాప్తు చేస్తున్నారు. పబ్‌లోని సీసీ టీవీ కెమెరా విజువల్స్‌ను పరిశీలించారు. నిందితులను గుర్తించి అదుపులోకి తీసుకుంటామని పోలీసులు చెబుతున్నారు.
