బాలీవుడ్ నటుడు రణ్వీర్ సింగ్ దేశవ్యాప్తంగా సంచలనం సృష్టించిన కన్నడ చిత్రం **’కాంతార’**లోని ఒక కీలక సన్నివేశాన్ని అనుకరించడంలో వివాదంలో చిక్కుకున్నారు. గోవాలో జరిగిన ఇంటర్నేషనల్ ఫిల్మ్ ఫెస్టివల్ ఆఫ్ ఇండియా (IFFI) ముగింపు వేడుకలో ఈ ఘటన జరిగింది. రణ్వీర్ సింగ్ ‘కాంతార’లో రిషబ్ శెట్టి నటన అద్భుతమని ప్రశంసించినప్పటికీ, ఆ తర్వాత స్టేజ్పై దైవం ఆవహించిన సన్నివేశంలో వచ్చే ‘ఓ’ అనే శబ్దాన్ని కామెడీ చేస్తూ అనుకరించారు. ఆ సమయంలో అక్కడే ఉన్న రిషబ్ శెట్టి కొంత అసౌకర్యానికి గురైనట్లు వీడియోలో కనిపించింది.
ఈ సంఘటనకు సంబంధించిన వీడియో సోషల్ మీడియాలో వైరల్ కావడంతో, కన్నడిగులు మరియు నెటిజన్లు రణ్వీర్ను తీవ్రంగా ట్రోల్ చేస్తున్నారు. కన్నడిగులు ఎంతో పవిత్రంగా దైవంగా భావించే ఆ సన్నివేశాన్ని, ఆచారాన్ని అపహాస్యం చేయడం సరికాదని వారు మండిపడుతున్నారు. ఇది సాంస్కృతిక అగౌరవం అని పేర్కొంటూ, రణ్వీర్ సింగ్ తక్షణమే క్షమాపణ చెప్పాలని డిమాండ్ చేస్తున్నారు.
నెటిజన్ల ఆగ్రహం తీవ్రంగా ఉంది. రణ్వీర్ క్షమాపణ చెప్పకపోతే, ఆయన త్వరలో విడుదల కానున్న ‘ధురంధర్’ సినిమా రిలీజ్ను అడ్డుకుంటామని కన్నడిగులు హెచ్చరిస్తున్నారు. ‘ధురంధర్’ చిత్రం డిసెంబర్ 5న విడుదల కావాల్సి ఉంది. ఈ కొత్త వివాదం నేపథ్యంలో సినిమా విడుదలపై అనుమానాలు వ్యక్తమవుతున్నాయి, ఈ మొత్తం వ్యవహారంపై ‘కాంతార’ హీరో, దర్శకుడు రిషబ్ శెట్టి స్పందన ఎలా ఉంటుందనేది ఆసక్తికరంగా మారింది.
