తెలంగాణలో గత పార్లమెంట్ ఎన్నికల్లో సత్తా చాటిన బీజేపీ పార్టీ, తాజాగా జరిగిన జూబ్లీహిల్స్ ఉపఎన్నికలో ఘోర పరాజయాన్ని మూటగట్టుకుంది. అధికార కాంగ్రెస్ పార్టీకి, ప్రతిపక్ష బీఆర్ఎస్ పార్టీకి కనీస పోటీ కూడా ఇవ్వలేకపోయిన బీజేపీ అభ్యర్థి లంకల దీపక్ రెడ్డి దారుణంగా ఓడిపోయారు. ఈ ఎన్నికల్లో ఆయన కేవలం 17,061 ఓట్లు మాత్రమే సాధించి, డిపాజిట్ కోల్పోయారు. ఈ ఫలితం తెలంగాణలోని బీజేపీ శ్రేణులకు కోలుకోలేని షాక్‌గా మారింది.
కాంగ్రెస్ అభ్యర్థి నవీన్ యాదవ్ ఘన విజయం సాధించగా, బీఆర్ఎస్ పార్టీ రెండో స్థానంలో నిలిచింది. దీంతో బీజేపీ అభ్యర్థి దీపక్ రెడ్డికి మూడో స్థానానికే పరిమితం కావడం తీవ్ర నిరాశను కలిగించింది. ఒకవైపు బీహార్‌లో బీజేపీ నేతృత్వంలోని ఎన్డీయే కూటమి ఘన విజయం దిశగా దూసుకుపోతుండగా, తెలంగాణలో వచ్చిన ఈ ప్రతికూల ఫలితాలు ఆ పార్టీ శ్రేణులకు మింగుడుపడటం లేదు.
డిపాజిట్ కూడా గల్లంతు కావడాన్ని బీజేపీ నేతలు, కార్యకర్తలు జీర్ణించుకోలేకపోతున్నారు. ఈ ఓటమికి గల కారణాలపై పార్టీలో అంతర్గతంగా సమీక్ష జరగాల్సిన అవసరం ఉందని పలువురు అభిప్రాయపడుతున్నారు. జూబ్లీహిల్స్ ఫలితం తెలంగాణ రాజకీయాల్లో బీజేపీకి ఎదురుదెబ్బగా పరిగణించవచ్చు.
