ముంబై నగరంలో జరిగిన ప్రతిష్టాత్మక దాదాసాహెబ్ ఫాల్కే ఇంటర్నేషనల్ ఫిల్మ్ ఫెస్టివల్ (DPIFF) 2025 వేడుకల్లో తెలుగు సినిమాకు గర్వకారణంగా ప్రభాస్ నటించిన ‘కల్కి 2898 AD’ చిత్రం ‘ఫిల్మ్ ఆఫ్ ది ఇయర్’ (Film of the Year) అవార్డును గెలుచుకుంది. నాగ్ అశ్విన్ దర్శకత్వంలో తెరకెక్కిన ఈ సైన్స్ ఫిక్షన్ చిత్రం, తన విజువల్ గ్రాండియర్, వినూత్నమైన కాన్సెప్ట్ మరియు ప్రభాస్, దీపికా పదుకోన్, అమితాబ్ బచ్చన్ వంటి ప్రముఖ నటుల నటనలతో ప్రపంచవ్యాప్తంగా గుర్తింపు పొందింది.
ఈ అవార్డు ద్వారా తెలుగు సినిమా స్థాయి అంతర్జాతీయ స్థాయికి చేరిందని అభిమానులు సంతోషం వ్యక్తం చేస్తున్నారు. హారర్ కామెడీ జానర్‌లో సంచలనం సృష్టించిన ‘స్త్రీ-2’ బెస్ట్ మూవీ అవార్డును గెలుచుకుంది. వ్యక్తిగత విభాగాలలో, బెస్ట్ యాక్టర్‌గా కార్తీక్ ఆర్యన్, బెస్ట్ యాక్ట్రెస్‌గా కృతి సనన్, మరియు బెస్ట్ డైరెక్టర్‌గా కబీర్‌ఖాన్‌కు అవార్డులు దక్కాయి.
అలాగే, బెస్ట్ మ్యూజిక్ డైరెక్టర్‌గా దేవిశ్రీ ప్రసాద్ (పుష్ప-2 సినిమాకు) అవార్డును అందుకున్నారు. ఈ భారతీయ సినీ పరిశ్రమలో అత్యంత ప్రతిష్టాత్మకమైన అవార్డుల ప్రదానోత్సవానికి బాలీవుడ్, టాలీవుడ్‌ సహా పలు భాషల సినీ ప్రముఖులు హాజరయ్యారు.
